خرد والو جنوں والوں کے ویرانوں میں آ جاؤ

خرد والو جنوں والوں کے ویرانوں میں آ جاؤ

دلوں کے باغ زخموں کے گلستانوں میں آ جاؤ

یہ دامان و گریباں اب سلامت رہ نہیں سکتے

ابھی تک کچھ نہیں بگڑا ہے دیوانوں میں آ جاؤ

ستم کی تیغ خود دست ستم کو کاٹ دیتی ہے

ستم رانو تم اب اپنے عزا خانوں میں آ جاؤ

یہ کب تک سرد لاشیں بے حسی کے برف خانوں میں

چراغ درد سے روشن شبستانوں میں آ جاؤ

یہ کب تک سیم و زر کے جنگلوں میں مشق خونخواری

یہ انسانوں کی بستی ہے اب انسانوں میں آ جاؤ

کبھی شبنم کا قطرہ بن کے چمکو لالہ و گل پر

کبھی دریاؤں کی صورت بیابانوں میں آ جاؤ

ہوا ہے سخت اب اشکوں کے پرچم اڑ نہیں سکتے

لہو کے سرخ پرچم لے کے میدانوں میں آ جاؤ

جراحت خانۂ دل ہے تلاش رنگ و نکہت میں

کہاں ہو اے گلستانو گریبانوں میں آ جاؤ

زمانہ کر رہا ہے اہتمام جشن بے داری

گریباں چاک کر کے شعلہ دامانوں میں آ جاؤ

khirad walo junun walon ke wiranon mein a jao

dilon ke bagh zakhmon ke gulistanon mein a jao

ye daman-o-gareban ab salamat rah nahin sakte

abhi tak kuchh nahin bigra hai diwanon mein a jao

sitam ki tegh khud dast-e-sitam ko kat deti hai

sitam rano tum ab apne aza khanon mein a jao

ye kab tak sard lashen be hissi ke barf khanon mein

charagh-e-dard se raushan shabistanon mein a jao

ye kab tak sim-o-zar ke jangalon mein mashq khunkhwari

ye insanon ki basti hai ab insanon mein a jao

kabhi shabnam ka qatra ban ke chamko lala-o-gul par

kabhi dariyaon ki surat bayabanon mein a jao

hua hai sakht ab ashkon ke parcham ur nahin sakte

lahu ke surkh parcham le ke maidanon mein a jao

jarahat khana-e-dil hai talash rang-o-nikhat mein

kahan ho ai gulistano garebanon mein a jao

zamana kar raha hai ehtimam jashn-e-be dari

gareban chak kar ke shola daminon mein a jao