اب آ گیا ہے جہاں میں تو مسکراتا جا

اب آ گیا ہے جہاں میں تو مسکراتا جا

چمن کے پھول دلوں کے کنول کھلاتا جا

عدم حیات سے پہلے عدم حیات کے بعد

یہ ایک پل ہے اسے جاوداں بناتا جا

بھٹک رہی ہے اندھیرے میں زندگی کی برات

کوئی چراغ سر رہ گزر جلاتا جا

گزر چمن سے مثال نسیم صبح بہار

گلوں کو چھیڑ کے کانٹوں کو گدگداتا جا

رہ دراز ہے اور دور شوق کی منزل

گراں ہے مرحلۂ عمر گیت گاتا جا

بلا سے بزم میں گر ذوق نغمگی کم ہے

نوائے تلخ کو کچھ تلخ تر بناتا جا

جو ہو سکے تو بدل زندگی کو خود ورنہ

نژاد نو کو طریق جنوں سکھاتا جا

دکھا کے جلوۂ فردا بنا دے دیوانہ

نئے زمانے کے رخ سے نقاب اٹھاتا جا

بہت دنوں سے دل و جاں کی محفلیں ہیں اداس

کوئی ترانہ کوئی داستاں سناتا جا

ab a gaya hai jahan mein to muskurata ja

chaman ke phul dilon ke kanwal khilata ja

adam hayat se pahle adam hayat ke baad

ye ek pal hai use jawedan banata ja

bhatak rahi hai andhere mein zindagi ki barat

koi charagh-e-sar rah guzar jalata ja

guzar chaman se misal-e-nasim-e-subh-e-bahar

gulon ko chher ke kanton ko gudgudata ja

rah-e-daraz hai aur dur shauq ki manzil

giran hai marhala-e-umr git gata ja

bala se bazm mein gar zauq-e-naghmagi kam hai

nawa-e-talkh ko kuchh talkh tar banata ja

jo ho sake to badal zindagi ko khud warna

nazhad-e-nau ko tariq-e-junun sikhata ja

dikha ke jalwa-e-farda bana de diwana

nae zamane ke rukh se naqab uthata ja

bahut dinon se dil-o-jan ki mahfilen hain udas

koi tarana koi dastan sunata ja