مستیٔ رندانہ ہم سیرابیٔ مے خانہ ہم

مستیٔ رندانہ ہم سیرابیٔ مے خانہ ہم

گردش تقدیر سے ہیں گردش پیمانہ ہم

خون دل سے چشم تر تک چشم تر سے تا بہ خاک

کر گئے آخر گل و گلزار ہر ویرانہ ہم

کیا بلا جبر اسیری ہے کہ آزادی میں بھی

دوش پر اپنے لیے پھرتے ہیں زنداں خانہ ہم

راہ میں فوجوں کے پہرے سر پہ تلواروں کی چھاؤں

آئے ہیں زنداں میں بھی با شوکت شاہانہ ہم

مٹتے مٹتے دے گئے ہم زندگی کو رنگ و نور

رفتہ رفتہ بن گئے اس عہد کا افسانہ ہم

یا جگا دیتے ہیں ذروں کے دلوں میں مے کدے

یا بنا لیتے ہیں مہر و ماہ کو پیمانہ ہم

قید ہو کر اور بھی زنداں میں اڑتا ہے خیال

رقص زنجیروں میں بھی کرتے ہیں آزادانہ ہم

masti-e-rindana ham sairabi-e-mai khana ham

gardish-e-taqdir se hain gardish-e-paimana ham

khun-e-dil se chashm-e-tar tak chashm-e-tar se ta ba khak

kar gae akhir gul-o-gulzar har wirana ham

kya bala jabr-e-asiri hai ke azadi mein bhi

dosh par apne liye phirte hain zindan khana ham

rah mein faujon ke pahre sar pe talwaron ki chhaon

ae hain zindan mein bhi ba shaukat-e-shahana ham

mitte mitte de gae ham zindagi ko rang-o-nur

rafta rafta ban gae is ahd ka afsana ham

ya jaga dete hain zarron ke dilon mein mai kade

ya bana lete hain mehr-o-mah ko paimana ham

qaid ho kar aur bhi zindan mein urta hai khayal

raqs zanjiron mein bhi karte hain azadana ham