میں جہاں تم کو بلاتا ہوں وہاں تک آؤ

میں جہاں تم کو بلاتا ہوں وہاں تک آؤ

میری نظروں سے گزر کر دل و جاں تک آؤ

پھر یہ دیکھو کہ زمانے کی ہوا ہے کیسی

ساتھ میرے مرے فردوس جواں تک آؤ

حوصلہ ہو تو اڑو میرے تصور کی طرح

میری تخئیل کے گلزار جناں تک آؤ

تیغ کی طرح چلو چھوڑ کے آغوش نیام

تیر کی طرح سے آغوش کماں تک آؤ

پھول کے گرد پھرو باغ میں مانند نسیم

مثل پروانہ کسی شمع تپاں تک آؤ

لو وہ صدیوں کے جہنم کی حدیں ختم ہوئیں

اب ہے فردوس ہی فردوس جہاں تک آؤ

چھوڑ کر وہم و گماں حسن یقیں تک پہنچو

پر یقیں سے بھی کبھی وہم و گماں تک آؤ

اسی دنیا میں دکھا دیں تمہیں جنت کی بہار

شیخ جی تم بھی ذرا کوئے بتاں تک آؤ

main jahan tum ko bulata hun wahan tak ao

meri nazron se guzar kar dil-o-jan tak ao

phir ye dekho ke zamane ki hawa hai kaisi

sath mere mire firdaus jawan tak ao

hausla ho to uro mere tasawwur ki tarah

meri takhil ke gulzar-e-janan tak ao

tegh ki tarah chalo chhor ke aghosh-e-niyam

tir ki tarah se aghosh-e-kaman tak ao

phul ke gard phiro bagh mein manind-e-nasim

misl-e-parwana kisi shama tapan tak ao

lo wo sadiyon ke jahannam ki haden khatm huin

ab hai firdaus hi firdaus jahan tak ao

chhor kar wahm-o-guman husn-e-yaqin tak pahuncho

par yaqin se bhi kabhi wahm-o-guman tak ao

isi duniya mein dikha den tumhen jannat ki bahar

shaikh ji tum bhi zara ku-e-butan tak ao