انسانی درندے اور اس آسانی سے مر جائیں

انسانی درندے اور اس آسانی سے مر جائیں

یہ سوچنے بیٹھیں تو پریشانی سے مر جائیں

وہ جن کو میسر تھی ہر اک چیز دگر بھی

ممکن ہے سہولت کی فراوانی سے مر جائیں

کشتی پہ تھے کشتی کو جلاتے ہوئے حضرات

اب آگ سے بچ جائیں بھلے پانی سے مر جائیں

آئینے کا یہ کون سا سیزن ہے ہمیں کیا

دیوار کو تکتے ہوئے حیرانی سے مر جائیں

بابرؔ کوئی جذباتی کرونوں سے یہ پوچھے

کس کھاتے میں ہم آپ کی نادانی سے مر جائیں

اے دوست مکمل نظر انداز ہی کر دیکھ

ایسا نہ ہو ہم نیم نگہبانی سے مر جائیں

بچ جائیں تو آخر کسے کیا فرق پڑے گا

دشمن نہ سہی دوست پشیمانی سے مر جائیں

آنکھوں میں اترتے ہوئے اترائیں ستارے

سورج ہوں تو جل کر تری پیشانی سے مر جائیں

رانجھے کو تو پھر ہیر کی تصویر بہت ہے

جی کرتا تھا لگ کر اسی مرجانی سے مر جائیں

insani darinde aur is asani se mar jaen

ye sochne baithen to pareshani se mar jaen

wo jin ko muyassar thi har ik chiz digar bhi

mumkin hai suhulat ki farawani se mar jaen

kashti pe the kashti ko jalate hue hazrat

ab ag se bach jaen bhale pani se mar jaen

aine ka ye kaun sa sizan hai hamen kya

diwar ko takte hue hairani se mar jaen

babar koi jazbati karonon se ye puchhe

kis khate mein ham ap ki nadani se mar jaen

ai dost mukammal nazar andaz hi kar dekh

aisa na ho ham nim nigahbani se mar jaen

bach jaen to akhir kise kya farq parega

dushman na sahi dost pashemani se mar jaen

ankhon mein utarte hue itraen sitare

suraj hun to jal kar tiri peshani se mar jaen

ranjhe ko to phir hir ki taswir bahut hai

ji karta tha lag kar isi marjani se mar jaen