شہر ہوا میں جلتے رہنا اندیشوں کی چوکھٹ پر

شہر ہوا میں جلتے رہنا اندیشوں کی چوکھٹ پر

رات گئے تک الجھے رہنا بے مفہوم خیالوں میں

قصر عمر گواہی دے گا کیسے کیسے کرب سہے

کیسی کیسی رت گزری ہے ہم پر اتنے سالوں میں

دوش خلا سے خاک زمیں پر اترے تو احساس ہوا

تارے بانٹنے والے راہی پڑ گئے کن جنجالوں میں

لے آئی کس قریۂ شب میں اک جھوٹے مہتاب کی چاہ

سایہ سایہ بھٹک رہا ہوں بے تنویر اجالوں میں

موسم موسم یہی رہا گر خوشبو کی تحقیر کا رنگ

سیسے کی کلیاں پھوٹیں گی اب لوہے کی ڈالوں میں

ساجدؔ اب تک بھگت رہے ہیں اک بے انت سزا کی عمر

اپنا نام لکھا بیٹھے تھے اک دن جینے والوں میں

shahr hawa mein jalte rahna andeshon ki chaukhat par

rat gae tak uljhe rahna be mafhum khayalon mein

qasr-e-umr gawahi dega kaise kaise karb sahe

kaisi kaisi rut guzri hai ham par itne salon mein

dosh khala se khak zamin par utre to ehsas hua

tare bantne wale rahi par gae kin janjalon mein

le ai kis qarya-e-shab mein ik jhute mahtab ki chah

saya saya bhatak raha hun be tanwir ujalon mein

mausam mausam yahi raha gar khushbu ki tahqir ka rang

sise ki kaliyan phutengi ab lohe ki dalon mein

sajid ab tak bhagat rahe hain ik be ant saza ki umr

apna nam likha baithe the ik din jine walon mein