بندے زمین اور آسماں سرما کی شب کہانیاں

بندے زمین اور آسماں سرما کی شب کہانیاں

سچی ہیں یہ رفاقتیں باقی ہیں سب کہانیاں

خیمے اکھڑ اجڑ گئے ایسی ہوائے شب چلی

کرنیں زمیں پہ لکھ گئیں کیسی عجب کہانیاں

وسعت دشت کے مکیں وادی میں کوچ کر گئے

شاخوں پہ برف لکھ گئی نغمہ بہ لب کہانیاں

چاند کی خاک آ گئی پیروں تلے حیات کے

ایسی کٹھن روایتیں ایسی کڈھب کہانیاں

جوہر حق نہیں ملا مجھ کو کسی کتاب میں

مٹی سے سن رہا ہوں میں عالی نسب کہانیاں

وسعت کوہ و دشت ہو شہر و نگر کا گشت ہو

میرا سفر حکایتیں میرا ادب کہانیاں

شہروں کو کیا خبر کہ میں کون ہوں کس فضا میں ہوں

لکھنی ہیں ایک دن مجھے صبر طلب کہانیاں

bande zamin aur asman sarma ki shab kahaniyan

sachchi hain ye rifaqaten baqi hain sab kahaniyan

kheme ukhar ujar gae aisi hawa-e-shab chali

kirnen zamin pe likh gain kaisi ajab kahaniyan

wusat-e-dasht ke makin wadi mein kuch kar gae

shakhon pe barf likh gai naghma ba lab kahaniyan

chand ki khak a gai pairon tale hayat ke

aisi kathin riwayaten aisi kudhab kahaniyan

jauhar-e-haq nahin mila mujh ko kisi kitab mein

mitti se sun raha hun main ali nasab kahaniyan

wusat-e-koh-o-dasht ho shahr-o-nagar ka gasht ho

mera safar hikayaten mera adab kahaniyan

shahron ko kya khabar ke main kaun hun kis faza mein hun

likhni hain ek din mujhe sabr talab kahaniyan