آنکھوں سے عیاں زخم کی گہرائی تو اب ہے

آنکھوں سے عیاں زخم کی گہرائی تو اب ہے

اب آ بھی چکو وقت مسیحائی تو اب ہے

پہلے غم فرقت کے یہ تیور تو نہیں تھے

رگ رگ میں اترتی ہوئی تنہائی تو اب ہے

طاری ہے تمناؤں پہ سکرات کا عالم

ہر سانس رفاقت کی تمنائی تو اب ہے

کل تک مری وحشت سے فقط تم ہی تھے آگاہ

ہر گام پہ اندیشۂ رسوائی تو اب ہے

کیا جانے مہکتی ہوئی صبحوں میں کوئی دل

شاموں میں کسی درد کی رعنائی تو اب ہے

دل سوز یہ تارے ہیں تو جاں سوز یہ مہتاب

در اصل شب انجمن آرائی تو اب ہے

صف بستہ ہیں ہر موڑ پہ کچھ سنگ بکف لوگ

اے زخم ہنر لطف پذیرائی تو اب ہے

ankhon se ayan zakhm ki gahrai to ab hai

ab a bhi chuko waqt-e-masihai to ab hai

pahle gham-e-furqat ke ye tewar to nahin the

rag rag mein utarti hui tanhai to ab hai

tari hai tamannaon pe sakarat ka alam

har sans rifaqat ki tamannai to ab hai

kal tak miri wahshat se faqat tum hi the agah

har gam pe andesha-e-ruswai to ab hai

kya jane mahakti hui subhon mein koi dil

shamon mein kisi dard ki raanai to ab hai

dil soz ye tare hain to jan soz ye mahtab

dar asl-e-shab anjuman arai to ab hai

saf basta hain har mor pe kuchh sang bakaf log

ai zakhm-e-hunar lutf pazirai to ab hai