کہا دن کو بھی یہ گھر کس لیے ویران رہتا ہے

کہا دن کو بھی یہ گھر کس لیے ویران رہتا ہے

یہاں کیا ہم سا کوئی بے سر و سامان رہتا ہے

در و دیوار سناٹے کی چادر میں ہیں خوابیدہ

بھلا ایسی جگہ زندہ کوئی انسان رہتا ہے

مسلسل پوچھنے پر ایک چلمن سے جواب آیا

یہاں اک دل شکستہ صاحب دیوان رہتا ہے

جھجک کر میں نے پوچھا کیا کبھی باہر نہیں آتا

جواب آیا اسے خلوت میں اطمینان رہتا ہے

کہا کیا اس کے رشتہ دار بھی ملنے نہیں آتے

جواب آیا یہ صحرا رات دن سنسان رہتا ہے

کہا کوئی تو ہوگا اس کے دکھ سکھ بانٹنے والا

جواب آیا نہیں خالی یہ گھر یہ لان رہتا ہے

کہا اس گھر کے آنگن میں ہیں کچھ پھولوں کے پودے بھی

جواب آیا کہ خالی پھر بھی ہر گلدان رہتا ہے

کہا کیا اس محلے میں نہیں پرسان حال اس کا

جواب آیا خیال اس کا مجھے ہر آن رہتا ہے

خدا کا شکر ہے ہم اک فضا میں سانس لیتے ہیں

اگر ملتے نہیں اتنا تو اطمینان رہتا ہے

kaha din ko bhi ye ghar kis liye wiran rahta hai

yahan kya ham sa koi be sar-o-saman rahta hai

dar-o-diwar sannate ki chadar mein hain khwabida

bhala aisi jagah zinda koi insan rahta hai

musalsal puchhne par ek chilman se jawab aya

yahan ik dil shikasta sahab-e-diwan rahta hai

jhijak kar main ne puchha kya kabhi bahar nahin ata

jawab aya use khalwat mein itminan rahta hai

kaha kya us ke rishta dar bhi milne nahin ate

jawab aya ye sahra rat din sunsan rahta hai

kaha koi to hoga us ke dukh sukh bantne wala

jawab aya nahin khali ye ghar ye lan rahta hai

kaha is ghar ke angan mein hain kuchh phulon ke paude bhi

jawab aya ke khali phir bhi har guldan rahta hai

kaha kya is mohalle mein nahin parsan hal us ka

jawab aya khayal us ka mujhe har an rahta hai

khuda ka shukr hai ham ik faza mein sans lete hain

agar milte nahin itna to itminan rahta hai