یہ حسیں لوگ ہیں تو ان کی مروت پہ نہ جا

یہ حسیں لوگ ہیں تو ان کی مروت پہ نہ جا

خود ہی اٹھ بیٹھ کسی اذن و اجازت پہ نہ جا

صورت شمع ترے سامنے روشن ہیں جو پھول

ان کی کرنوں میں نہا ذوق سماعت پہ نہ جا

دل سی چیک بک ہے ترے پاس تجھے کیا دھڑکا

جی کو بھا جائے تو پھر چیز کی قیمت پہ نہ جا

اتنا کم ظرف نہ بن اس کے بھی سینے میں ہے دل

اس کا احساس بھی رکھ اپنی ہی راحت پہ نہ جا

دیکھتا کیا ہے ٹھہر کر مری جانب ہر روز

روزن در ہوں مری دید کی حیرت پہ نہ جا

تیرے دل سوختہ بیٹھے ہیں سر بام ابھی

بال کھولے ہوئے تاروں بھری اس چھت پہ نہ جا

میری پوشاک تو پہچان نہیں ہے میری

دل میں بھی جھانک مری ظاہری حالت پہ نہ جا

ye hasin log hain to un ki murawwat pe na ja

khud hi uth baith kisi izn-o-ijazat pe na ja

surat-e-shama tire samne raushan hain jo phul

un ki kirnon mein naha zauq-e-samaat pe na ja

dil si chek bik hai tire pas tujhe kya dharka

ji ko bha jae to phir chiz ki qimat pe na ja

itna kam zarf na ban us ke bhi sine mein hai dil

us ka ehsas bhi rakh apni hi rahat pe na ja

dekhta kya hai thahar kar miri janib har roz

rauzan-e-dar hun miri did ki hairat pe na ja

tere dil sokhta baithe hain sar-e-bam abhi

bal khole hue taron bhari is chhat pe na ja

meri poshak to pahchan nahin hai meri

dil mein bhi jhank miri zahiri halat pe na ja