یہ ٹھیک ہے کہ بہت وحشتیں بھی ٹھیک نہیں

یہ ٹھیک ہے کہ بہت وحشتیں بھی ٹھیک نہیں

مگر ہماری ذرا عادتیں بھی ٹھیک نہیں

اگر ملو تو کھلے دل کے ساتھ ہم سے ملو

کہ رسمی رسمی سی یہ چاہتیں بھی ٹھیک نہیں

تعلقات میں گہرائیاں تو اچھی ہیں

کسی سے اتنی مگر قربتیں بھی ٹھیک نہیں

دل و دماغ سے گھایل ہیں تیرے ہجر نصیب

شکستہ در بھی ہیں ان کی چھتیں بھی ٹھیک نہیں

قلم اٹھا کے چلو حال دل ہی لکھ ڈالو

کہ رات دن کی بہت فرقتیں بھی ٹھیک نہیں

تم اعتبارؔ پریشاں بھی ان دنوں ہو بہت

دکھائی پڑتا ہے کچھ صحبتیں بھی ٹھیک نہیں

ye thik hai ke bahut wahshaten bhi thik nahin

magar hamari zara adaten bhi thik nahin

agar milo to khule dil ke sath ham se milo

ke rasmi rasmi si ye chahaten bhi thik nahin

taalluqat mein gahraiyan to achchhi hain

kisi se itni magar qurbaten bhi thik nahin

dil-o-dimagh se ghayal hain tere hijr nasib

shikasta dar bhi hain un ki chhaten bhi thik nahin

qalam utha ke chalo hal-e-dil hi likh dalo

ke rat din ki bahut firqaten bhi thik nahin

tum etibar pareshan bhi in dinon ho bahut

dikhai parta hai kuchh sohbaten bhi thik nahin