بند دریچے سونی گلیاں ان دیکھے انجانے لوگ

بند دریچے سونی گلیاں ان دیکھے انجانے لوگ

کس نگری میں آ نکلے ہیں ساجدؔ ہم دیوانے لوگ

ایک ہمی ناواقف ٹھہرے روپ نگر کی گلیوں سے

بھیس بدل کر ملنے والے سب جانے پہچانے لوگ

دن کو رات کہیں سو برحق صبح کو شام کہیں سو خوب

آپ کی بات کا کہنا ہی کیا آپ ہوئے فرزانے لوگ

شکوہ کیا اور کیسی شکایت آخر کچھ بنیاد تو ہو

تم پر میرا حق ہی کیا ہے تم ٹھہرے بیگانے لوگ

شہر کہاں خالی رہتا ہے یہ دریا ہر دم بہتا ہے

اور بہت سے مل جائیں گے ہم ایسے دیوانے لوگ

سنا ہے اس کے عہد وفا میں ہوا بھی مفت نہیں ملتی

ان گلیوں میں ہر ہر سانس پہ بھرتے ہیں جرمانے لوگ

band dariche suni galiyan an dekhe anjane log

kis nagri mein a nikle hain sajid ham diwane log

ek hami nawaqif thahre rup nagar ki galiyon se

bhes badal kar milne wale sab jane pahchane log

din ko rat kahin so barhaq subh ko sham kahin so khub

ap ki bat ka kahna hi kya ap hue farzane log

shikwa kya aur kaisi shikayat akhir kuchh buniyad to ho

tum par mera haq hi kya hai tum thahre begane log

shahr kahan khali rahta hai ye dariya har dam bahta hai

aur bahut se mil jaenge ham aise diwane log

suna hai us ke ahd-e-wafa mein hua bhi muft nahin milti

un galiyon mein har har sans pe bharte hain jurmane log