کسی نے دل کے طاق پر جلا کے رکھ دیا ہمیں

کسی نے دل کے طاق پر جلا کے رکھ دیا ہمیں

مگر ہوائے ہجر نے بجھا کے رکھ دیا ہمیں

ہزار ہم نے ضبط سے لیا تھا کام کیا کریں

کسی کے آنسوؤں نے پھر رلا کے رکھ دیا ہمیں

ہماری شہرتیں خراب اس طرح بھی اس نے کیں

کہ اپنے آشناؤں سے ملا کے رکھ دیا ہمیں

ہمیں اس انجمن میں جانے اس نے کیوں بلا لیا

بلا لیا اور اک طرف بٹھا کے رکھ دیا ہمیں

فقط ہم ایک دیکھنے کی چیز بن کے رہ گئے

کسی نے ایسا عشق میں بنا کے رکھ دیا ہمیں

ہم اعتبارؔ اس کی ہر شکست میں شریک تھے

مگر بساط سے الگ اٹھا کے رکھ دیا ہمیں

kisi ne dil ke taq par jala ke rakh diya hamen

magar hawa-e-hijr ne bujha ke rakh diya hamen

hazar ham ne zabt se liya tha kam kya karen

kisi ke ansuon ne phir rula ke rakh diya hamen

hamari shohraten kharab is tarah bhi us ne kin

ke apne ashnaon se mila ke rakh diya hamen

hamen is anjuman mein jane us ne kyun bala liya

bala liya aur ik taraf bitha ke rakh diya hamen

faqat ham ek dekhne ki chiz ban ke rah gae

kisi ne aisa ishq mein bana ke rakh diya hamen

ham etibar us ki har shikast mein sharik the

magar bisat se alag utha ke rakh diya hamen