طلسم زار شب ماہ میں گزر جائے

طلسم زار شب ماہ میں گزر جائے

اب اتنی رات گئے کون اپنے گھر جائے

عجب نشہ ہے ترے قرب میں کہ جی چاہے

یہ زندگی تری آغوش میں گزر جائے

میں تیرے جسم میں کچھ اس طرح سما جاؤں

کہ تیرا لمس مری روح میں اتر جائے

مثال برگ خزاں ہے ہوا کی زد پہ یہ دل

نہ جانے شاخ سے بچھڑے تو پھر کدھر جائے

میں یوں اداس ہوں امشب کہ جیسے رنگ گلاب

خزاں کی چاپ سے بے ساختہ اتر جائے

ہوائے شام جدائی ہے اور غم لاحق

نہ جانے جسم کی دیوار کب بکھر جائے

اگر نہ شب کا سفر ہو ترے حصول کی شرط

فروغ مہر ترا اعتبار مر جائے

tilism-e-zar-e-shab mah mein guzar jae

ab itni rat gae kaun apne ghar jae

ajab nasha hai tire qurb mein ke ji chahe

ye zindagi tiri aghosh mein guzar jae

main tere jism mein kuchh is tarah sama jaun

ke tera lams miri ruh mein utar jae

misal-e-barg-e-khizan hai hawa ki zad pe ye dil

na jane shakh se bichhre to phir kidhar jae

main yun udas hun umshab ke jaise rang gulab

khizan ki chap se be sakhta utar jae

hawa-e-sham-e-judai hai aur gham lahaq

na jane jism ki diwar kab bikhar jae

agar na shab ka safar ho tire husul ki shart

farogh-e-mehr tira etibar mar jae