خیال حسن بے مثال دسترس میں آ گیا

خیال حسن بے مثال دسترس میں آ گیا

خودی پہ اختیار میرا پیش و پس میں آ گیا

یہیں کہیں پہ آخری پڑاؤ زندگی کا ہے

تمہارا سوگ آج لہجۂ جرس میں آ گیا

نظر کو پھیر کر اسیر درد کر گئے ہو تم

میں اک پرند بے نوا کسی قفس میں آ گیا

وہ راستوں کے پیچ و خم سنوارتا چلا گیا

ادھر بھی حوصلہ سا کچھ نفس نفس میں آ گیا

چمن چمن خزاں کی رت کا ہم سفر بنا رہا

کچھ ایسا رنگ گلستاں کے خار و خس میں آ گیا

وہ ممکنات کا سفر جو طے کیا گیا نہیں

گمان سے نکل گیا ہے اب ہوس میں آ گیا

یقین سے ہے بالاتر کہ آج تک دل عمرؔ

کسی کے بس کا تھا نہیں کسی کے بس میں آ گیا

khayal-e-husn-e-be misal dastaras mein a gaya

khudi pe ikhtiyar mera pesh-o-pas mein a gaya

yahin kahin pe akhiri parao zindagi ka hai

tumhara sog aj lahja-e-jaras mein a gaya

nazar ko pher kar asir-e-dard kar gae ho tum

main ik parind be nawa kisi qafas mein a gaya

wo raston ke pech-o-kham sanwarta chala gaya

idhar bhi hausla sa kuchh nafas nafas mein a gaya

chaman chaman khizan ki rut ka ham safar bana raha

kuchh aisa rang-e-gulsitan ke khar-o-khas mein a gaya

wo mumkinat ka safar jo tai kiya gaya nahin

guman se nikal gaya hai ab hawas mein a gaya

yaqin se hai balatar ke aj tak dil umr

kisi ke bas ka tha nahin kisi ke bas mein a gaya