گھر کی دہلیز سے بازار میں مت آ جانا

گھر کی دہلیز سے بازار میں مت آ جانا

تم کسی چشم خریدار میں مت آ جانا

خاک اڑانا انہیں گلیوں میں بھلا لگتا ہے

چلتے پھرتے کسی دربار میں مت آ جانا

یوں ہی خوشبو کی طرح پھیلتے رہنا ہر سو

تم کسی دام طلب گار میں مت آ جانا

دور ساحل پہ کھڑے رہ کے تماشا کرنا

کسی امید کے منجدھار میں مت آ جانا

اچھے لگتے ہو کہ خود سر نہیں خوددار ہو تم

ہاں سمٹ کے بت پندار میں مت آ جانا

چاند کہتا ہوں تو مطلب نہ غلط لینا تم

رات کو روزن دیوار میں مت آ جانا

ghar ki dahliz se bazar mein mat a jana

tum kisi chashm-e-kharidar mein mat a jana

khak urana unhen galiyon mein bhala lagta hai

chalte phirte kisi darbar mein mat a jana

yun hi khushbu ki tarah phailte rahna har su

tum kisi dam talab gar mein mat a jana

dur sahil pe khare rah ke tamasha karna

kisi ummid ke manjdhar mein mat a jana

achchhe lagte ho ke khud sar nahin khuddar ho tum

han simat ke but-e-pindar mein mat a jana

chand kahta hun to matlab na ghalat lena tum

rat ko rauzan-e-diwar mein mat a jana