تری رحمتوں کے دیار میں ترے بادلوں کو پتا نہیں

تری رحمتوں کے دیار میں ترے بادلوں کو پتا نہیں

ابھی آگ سرد ہوئی نہیں ابھی اک الاؤ جلا نہیں

مری بزم دل تو اجڑ چکی مرا فرش جاں تو سمٹ چکا

سبھی جا چکے مرے ہم نشیں مگر ایک شخص گیا نہیں

در و بام سب نے سجا لیے سبھی روشنی میں نہا لیے

مری انگلیاں بھی جھلس گئیں مگر اک چراغ جلا نہیں

غم زندگی تری راہ میں شب آرزو تری چاہ میں

جو اجڑ گیا وہ بسا نہیں جو بچھڑ گیا وہ ملا نہیں

جو دل و نظر کا سرور تھا مرے پاس رہ کے بھی دور تھا

وہی ایک گلاب امید کا مری شاخ جاں پہ کھلا نہیں

پس کارواں سر رہ گزر میں شکستہ پا ہوں تو اس لیے

کہ قدم تو سب سے ملا لیے مرا دل کسی سے ملا نہیں

مرا ہم سفر جو عجیب ہے تو عجیب تر ہوں میں آپ بھی

مجھے منزلوں کی خبر نہیں اسے راستوں کا پتہ نہیں

tiri rahmaton ke dayar mein tire badalon ko pata nahin

abhi ag sard hui nahin abhi ik alao jala nahin

miri bazm-e-dil to ujar chuki mira farsh-e-jan to simat chuka

sabhi ja chuke mire ham nashin magar ek shakhs gaya nahin

dar-o-bam sab ne saja liye sabhi raushni mein naha liye

miri ungliyan bhi jhulas gain magar ik charagh jala nahin

gham-e-zindagi tiri rah mein shab-e-arzu tiri chah mein

jo ujar gaya wo basa nahin jo bichhar gaya wo mila nahin

jo dil-o-nazar ka surur tha mire pas rah ke bhi dur tha

wahi ek gulab ummid ka miri shakh-e-jan pe khula nahin

pas karwan sar-e-rah guzar mein shikasta pa hun to is liye

ke qadam to sab se mila liye mira dil kisi se mila nahin

mira ham safar jo ajib hai to ajib tar hun main ap bhi

mujhe manzilon ki khabar nahin use raston ka pata nahin