بہت سجائے تھے آنکھوں میں خواب میں نے بھی

بہت سجائے تھے آنکھوں میں خواب میں نے بھی

سہے ہیں اس کے لیے یہ عذاب میں نے بھی

جدائیوں کی خلش اس نے بھی نہ ظاہر کی

چھپائے اپنے غم و اضطراب میں نے بھی

دیئے بجھا کے سر شام سو گیا تھا وہ

بتائی سو کے شب ماہتاب میں نے بھی

یہی نہیں کہ مجھے اس نے درد ہجر دیا

جدائیوں کا دیا ہے جواب میں نے بھی

کسی نے خون میں تر چوڑیاں جو بھیجی ہیں

لکھی ہے خون جگر سے کتاب میں نے بھی

خزاں کا وار بہت کار گر تھا دل پہ مگر

بہت بچا کے رکھا یہ گلاب میں نے بھی

bahut sajae the ankhon mein khwab main ne bhi

sahe hain us ke liye ye azab main ne bhi

judaiyon ki khalish us ne bhi na zahir ki

chhupae apne gham-o-iztirab main ne bhi

diye bujha ke sar-e-sham so gaya tha wo

batai so ke shab-e-mahtab main ne bhi

yahi nahin ke mujhe us ne dard-e-hijr diya

judaiyon ka diya hai jawab main ne bhi

kisi ne khun mein tar chauriyan jo bheji hain

likhi hai khun-e-jigar se kitab main ne bhi

khizan ka war bahut kar gar tha dil pe magar

bahut bacha ke rakha ye gulab main ne bhi