قافلے لٹ گئے سر نوک سناں تک پہنچے

قافلے لٹ گئے سر نوک سناں تک پہنچے

جب بہاروں کے طلب گار خزاں تک پہنچے

آپ کا عشق مسافت ہے تو بس اتنا کہ ہم

دشت امکاں سے چلے دشت زیاں تک پہنچے

ہم سے پوچھو کہ سمٹ آتا ہے کیسے گریہ

لمحے لمحے کا سفر بار گراں تک پہنچے

میرے حصے میں دلاسے پہ دلاسے آئے

خوش نصیبان سفر تیری اماں تک پہنچے

مدتوں خاک اڑائی گئی صحرا صحرا

تب کہیں جا کے ترے نام و نشاں تک پہنچے

بارہا ضبط‌ مسلسل کو بکھرتے دیکھا

لفظ در لفظ وہ جب میری زباں تک پہنچے

پھر نئی راہ نظر آنے لگی ہے مجھ کو

جب مرے سارے یقیں حسن گماں تک پہنچے

qafile lut gae sar nok-e-sinan tak pahunche

jab baharon ke talab gar khizan tak pahunche

ap ka ishq masafat hai to bas itna ke ham

dasht-e-imkan se chale dasht-e-ziyan tak pahunche

ham se puchho ke simat ata hai kaise girya

lamhe lamhe ka safar bar-e-giran tak pahunche

mere hisse mein dilase pe dilase ae

khush nasiban safar teri aman tak pahunche

muddaton khak urai gai sahra sahra

tab kahin ja ke tire nam-o-nishan tak pahunche

barha zabt musalsal ko bikharte dekha

lafz dar lafz wo jab meri zaban tak pahunche

phir nai rah nazar ane lagi hai mujh ko

jab mire sare yaqin husn guman tak pahunche