یہ برسوں کا تعلق توڑ دینا چاہتے ہیں ہم

یہ برسوں کا تعلق توڑ دینا چاہتے ہیں ہم

اب اپنے آپ کو بھی چھوڑ دینا چاہتے ہیں ہم

کسی دہلیز پر آنکھوں کے یہ روشن دیئے رکھ کر

ضمیر صبح کو جھنجھوڑ دینا چاہتے ہیں ہم

جدھر ہم جا رہے ہیں اس طرف ٹوٹا ہوا پل ہے

یہ باگیں اس سے پہلے موڑ دینا چاہتے ہیں ہم

یہ نوبت کل جو آنی ہے تو شرمندہ نہیں ہوں گے

مراسم احتیاطاً توڑ دینا چاہتے ہیں ہم

عجب دیوانگی ہے جس کے ہم سائے میں بیٹھے ہیں

اسی دیوار سے سر پھوڑ دینا چاہتے ہیں ہم

تعلق کرچیوں کی شکل میں بکھرا تو ہے پھر بھی

شکستہ آئینوں کو جوڑ دینا چاہتے ہیں ہم

ye barson ka taalluq tor dena chahte hain ham

ab apne ap ko bhi chhor dena chahte hain ham

kisi dahliz par ankhon ke ye raushan diye rakh kar

zamir-e-subh ko jhinjhor dena chahte hain ham

jidhar ham ja rahe hain is taraf tuta hua pal hai

ye bagen is se pahle mor dena chahte hain ham

ye naubat kal jo ani hai to sharminda nahin honge

marasim ehtiyatan tor dena chahte hain ham

ajab diwangi hai jis ke ham sae mein baithe hain

isi diwar se sar phor dena chahte hain ham

taalluq kirchiyon ki shakl mein bikhra to hai phir bhi

shikasta ainon ko jor dena chahte hain ham