ڈھونڈتے کیا ہو ان آنکھوں میں کہانی میری

ڈھونڈتے کیا ہو ان آنکھوں میں کہانی میری

خود میں گم رہنا تو عادت ہے پرانی میری

بھیڑ میں بھی تمہیں مل جاؤں گا آسانی سے

کھویا کھویا ہوا رہنا ہے نشانی میری

میں نے اک بار کہا تھا کہ بہت پیاسا ہوں

تب سے مشہور ہوئی تشنہ دہانی میری

یہی دیوار و در و بام تھے میرے ہم راز

انہی گلیوں میں بھٹکتی تھی جوانی میری

تو بھی اس شہر کا باسی ہے تو دل سے لگ جا

تجھ سے وابستہ ہے اک یاد پرانی میری

کربلا دشت محبت کو بنا رکھا ہے

کیا غزل گوئی ہے کیا مرثیہ خوانی میری

دھیمے لہجے کا سخنور ہوں نہ صہبا ہوں نہ جوش

میں کہاں اور کہاں شعلہ بیانی میری

dhundte kya ho in ankhon mein kahani meri

khud mein gum rahna to adat hai purani meri

bhir mein bhi tumhen mil jaunga asani se

khoya khoya hua rahna hai nishani meri

main ne ik bar kaha tha ke bahut pyasa hun

tab se mashhur hui tishna dahani meri

yahi diwar-o-dar-o-bam the mere ham raz

unhi galiyon mein bhatakti thi jawani meri

tu bhi is shahr ka basi hai to dil se lag ja

tujh se wabasta hai ik yad purani meri

karbala dasht-e-mohabbat ko bana rakha hai

kya ghazal goi hai kya marsiya khwani meri

dhime lahje ka sukhanwar hun na sahba hun na josh

main kahan aur kahan shola bayani meri