مجھے ایسا لطف عطا کیا کہ جو ہجر تھا نہ وصال تھا

مجھے ایسا لطف عطا کیا کہ جو ہجر تھا نہ وصال تھا

مرے موسموں کے مزاج داں تجھے میرا کتنا خیال تھا

کسی اور چہرے کو دیکھ کر تری شکل ذہن میں آ گئی

ترا نام لے کے ملا اسے میرے حافظے کا یہ حال تھا

کبھی موسموں کے سراب میں کبھی بام و در کے عذاب میں

وہاں عمر ہم نے گزار دی جہاں سانس لینا محال تھا

کبھی تو نے غور نہیں کیا کہ یہ لوگ کیسے اجڑ گئے

کوئی میرؔ جیسا گرفتہ دل تیرے سامنے کی مثال تھا

ترے بعد کوئی نہیں ملا جو یہ حال دیکھ کے پوچھتا

مجھے کس کی آگ جلا گئی مرے دل کو کس کا ملال تھا

کہیں خون دل سے لکھا تو تھا ترے سال ہجر کا سانحہ

وہ ادھوری ڈائری کھو گئی وہ نہ جانے کون سا سال تھا

mujhe aisa lutf ata kiya ke jo hijr tha na wisal tha

mire mausamon ke mizaj dan tujhe mera kitna khayal tha

kisi aur chehre ko dekh kar tiri shakl-e-zehn mein a gai

tira nam le ke mila use mere hafize ka ye hal tha

kabhi mausamon ke sarab mein kabhi bam-o-dar ke azab mein

wahan umr ham ne guzar di jahan sans lena muhal tha

kabhi tu ne ghaur nahin kiya ke ye log kaise ujar gae

koi mir jaisa girafta dil tere samne ki misal tha

tire baad koi nahin mila jo ye hal dekh ke puchhta

mujhe kis ki ag jala gai mire dil ko kis ka malal tha

kahin khun-e-dil se likha to tha tire sal hijr ka saneha

wo adhuri dairi kho gai wo na jane kaun sa sal tha