ورنہ کیا آب و ہوا چیز ہے کیسا موسم

ورنہ کیا آب و ہوا چیز ہے کیسا موسم

تیرے آنے سے ہوا شہر میں اچھا موسم

یہ مہ و مہر اضافی ہیں ترے سر کی قسم

وقت بتلاتی ہیں آنکھیں تری چہرا موسم

دھوپ میں چھاؤں کہیں موج میں طوفان کہیں

جیسا اے دوست ترا موڈ ہے ویسا موسم

رنگ و بو رکھتے ہیں سب پھول پھل اپنی اپنی

چشم و ابرو سے الگ عارض و لب کا موسم

اس قدر حسن اچانک مرا دل توڑ نہ دے

ایک تو پیارا ہے تو اس پہ یہ پیارا موسم

نہ وبا کے کوئی دن رات نہ تنہائی کے سال

تیرے آتے ہی بدل جاتا ہے سارا موسم

warna kya ab-o-hawa chiz hai kaisa mausam

tere ane se hua shahr mein achchha mausam

ye mah-o-mehr izafi hain tire sar ki qasam

waqt batlati hain ankhen tiri chehra mausam

dhup mein chhaon kahin mauj mein tufan kahin

jaisa ai dost tira mud hai waisa mausam

rang-o-bu rakhte hain sab phul phal apni apni

chashm-o-abru se alag ariz-o-lab ka mausam

is qadar husn achanak mira dil tor na de

ek to pyara hai to us pe ye pyara mausam

na waba ke koi din rat na tanhai ke sal

tere ate hi badal jata hai sara mausam