اشک دامن میں بھرے خواب کمر پر رکھا

اشک دامن میں بھرے خواب کمر پر رکھا

پھر قدم ہم نے تری راہ گزر پر رکھا

ہم نے اک ہاتھ سے تھاما شب غم کا آنچل

اور اک ہاتھ کو دامان سحر پر رکھا

چلتے چلتے جو تھکے پاؤں تو ہم بیٹھ گئے

نیند گٹھری پہ دھری خواب شجر پر رکھا

جانے کس دم نکل آئے ترے رخسار کی دھوپ

مدتوں دھیان ترے سایۂ در پر رکھا

جاتے موسم نے پلٹ کر بھی نہ دیکھا مشتاقؔ

رہ گیا ساغر گل سبزۂ تر پر رکھا

ashk daman mein bhare khwab kamar par rakha

phir qadam ham ne tiri rah guzar par rakha

ham ne ik hath se thama shab-e-gham ka anchal

aur ik hath ko daman-e-sahar par rakha

chalte chalte jo thake paon to ham baith gae

nind gathri pe dhari khwab shajar par rakha

jane kis dam nikal ae tire rukhsar ki dhup

muddaton dhyan tire saya-e-dar par rakha

jate mausam ne palat kar bhi na dekha mushtaq

rah gaya saghar-e-gul sabza-e-tar par rakha