چھن گئی تیری تمنا بھی تمنائی سے

چھن گئی تیری تمنا بھی تمنائی سے

دل بہلتے ہیں کہیں حوصلہ افزائی سے

کیسا روشن تھا ترا نیند میں ڈوبا چہرہ

جیسے ابھرا ہو کسی خواب کی گہرائی سے

وہی آشفتہ مزاجی وہی خوشیاں وہی غم

عشق کا کام لیا ہم نے شناسائی سے

نہ کبھی آنکھ بھر آئی نہ ترا نام لیا

بچ کے چلتے رہے ہر کوچۂ رسوائی سے

ہجر کے دم سے سلامت ہے ترے وصل کی آس

تر و تازہ ہے خوشی غم کی توانائی سے

کھل کے مرجھا بھی گئے فصل ملاقات کے پھول

ہم ہی فارغ نہ ہوئے موسم تنہائی سے

chhin gai teri tamanna bhi tamannai se

dil bahalte hain kahin hausla afzai se

kaisa raushan tha tira nind mein duba chehra

jaise ubhra ho kisi khwab ki gahrai se

wahi ashufta mizaji wahi khushiyan wahi gham

ishq ka kam liya ham ne shanasai se

na kabhi ankh bhar ai na tira nam liya

bach ke chalte rahe har kucha-e-ruswai se

hijr ke dam se salamat hai tire wasl ki as

tar-o-taza hai khushi gham ki tawanai se

khul ke murjha bhi gae fasl-e-mulaqat ke phul

ham hi farigh na hue mausam-e-tanhai se