یہ کون خواب میں چھو کر چلا گیا مرے لب

یہ کون خواب میں چھو کر چلا گیا مرے لب

پکارتا ہوں تو دیتے نہیں صدا مرے لب

یہ اور بات کسی کے لبوں تلک نہ گئے

مگر قریب سے گزرے ہیں بارہا مرے لب

اب اس کی شکل بھی مشکل سے یاد آتی ہے

وہ جس کے نام سے ہوتے نہ تھے جدا مرے لب

اب ایک عمر سے گفت و شنید بھی تو نہیں

ہیں بے نصیب مرے کان بے نوا مرے لب

یہ شاخسانۂ وہم و گمان تھا شاید

کجا وہ ثمرۂ باغ طلب کجا مرے لب

ye kaun khwab mein chhu kar chala gaya mire lab

pukarta hun to dete nahin sada mire lab

ye aur bat kisi ke labon talak na gae

magar qarib se guzre hain barha mire lab

ab us ki shakl bhi mushkil se yad ati hai

wo jis ke nam se hote na the juda mire lab

ab ek umr se guft-o-shanid bhi to nahin

hain be nasib mire kan be nawa mire lab

ye shakhsana-e-wahm-o-guman tha shayad

kuja wo samara-e-bagh talab kuja mire lab