لبھاتا ہے اگرچہ حسن دریا ڈر رہا ہوں میں

لبھاتا ہے اگرچہ حسن دریا ڈر رہا ہوں میں

سبب یہ ہے کہ اک مدت کنارے پر رہا ہوں میں

یہ جھونکے جن سے دل میں تازگی آنکھوں میں ٹھنڈک ہے

انہی جھونکوں سے مرجھایا ہوا شب بھر رہا ہوں میں

ترے آنے کا دن ہے تیرے رستے میں بچھانے کو

چمکتی دھوپ میں سائے اکٹھے کر رہا ہوں میں

کوئی کمرہ ہے جس کے طاق میں اک شمع جلتی ہے

اندھیری رات ہے اور سانس لیتے ڈر رہا ہوں میں

مجھے معلوم ہے اہل وفا پر کیا گزرتی ہے

سمجھ کر سوچ کر تجھ سے محبت کر رہا ہوں میں

lubhata hai agarche husn dariya dar raha hun main

sabab ye hai ke ik muddat kinare par raha hun main

ye jhonke jin se dil mein tazgi ankhon mein thandak hai

unhi jhonkon se murjhaya hua shab bhar raha hun main

tire ane ka din hai tere raste mein bichhane ko

chamakti dhup mein sae ikatthe kar raha hun main

koi kamra hai jis ke taq mein ik shama jalti hai

andheri rat hai aur sans lete dar raha hun main

mujhe maalum hai ahl-e-wafa par kya guzarti hai

samajh kar soch kar tujh se mohabbat kar raha hun main