دل میں وہ شور نہ آنکھوں میں وہ نم رہتا ہے

دل میں وہ شور نہ آنکھوں میں وہ نم رہتا ہے

اب تپ ہجر توقع سے بھی کم رہتا ہے

کبھی شعلے سے لپکتے تھے مرے سینے میں

اب کسی وقت دھواں سا کوئی دم رہتا ہے

کیا خدا جانے مرے دل کو ہوا تیرے بعد

نہ خوشی اس میں ٹھہرتی ہے نہ غم رہتا ہے

رشتۂ تار تمنا نہیں ٹوٹا اب تک

اب بھی آنکھوں میں تری زلف کا خم رہتا ہے

چھوڑ جاتی ہے ہر اک رت کوئی خوشبو کوئی رنگ

نہ ستم رہتا ہے باقی نہ کرم رہتا ہے

dil mein wo shor na ankhon mein wo nam rahta hai

ab tap-e-hijr tawaqqo se bhi kam rahta hai

kabhi shole se lapakte the mire sine mein

ab kisi waqt dhuan sa koi dam rahta hai

kya khuda jane mire dil ko hua tere baad

na khushi is mein thaharti hai na gham rahta hai

rishta-e-tar-e-tamanna nahin tuta ab tak

ab bhi ankhon mein tiri zulf ka kham rahta hai

chhor jati hai har ik rut koi khushbu koi rang

na sitam rahta hai baqi na karam rahta hai