پتا اب تک نہیں بدلا ہمارا

پتا اب تک نہیں بدلا ہمارا

وہی گھر ہے وہی قصہ ہمارا

وہی ٹوٹی ہوئی کشتی ہے اپنی

وہی ٹھہرا ہوا دریا ہمارا

یہ مقتل بھی ہے اور کنج اماں بھی

یہ دل یہ بے نشاں کمرہ ہمارا

کسی جانب نہیں کھلتے دریچے

کہیں جاتا نہیں رستہ ہمارا

ہم اپنی دھوپ میں بیٹھے ہیں مشتاقؔ

ہمارے ساتھ ہے سایا ہمارا

pata ab tak nahin badla hamara

wahi ghar hai wahi qissa hamara

wahi tuti hui kashti hai apni

wahi thahra hua dariya hamara

ye maqtal bhi hai aur kunj-e-aman bhi

ye dil ye be nishan kamra hamara

kisi janib nahin khulte dariche

kahin jata nahin rasta hamara

ham apni dhup mein baithe hain mushtaq

hamare sath hai saya hamara