تم آئے ہو تمہیں بھی آزما کر دیکھ لیتا ہوں

تم آئے ہو تمہیں بھی آزما کر دیکھ لیتا ہوں

تمہارے ساتھ بھی کچھ دور جا کر دیکھ لیتا ہوں

ہوائیں جن کی اندھی کھڑکیوں پر سر پٹکتی ہیں

میں ان کمروں میں پھر شمعیں جلا کر دیکھ لیتا ہوں

عجب کیا اس قرینے سے کوئی صورت نکل آئے

تری باتوں کو خوابوں سے ملا کر دیکھ لیتا ہوں

سحر دم کرچیاں ٹوٹے ہوئے خوابوں کی ملتی ہیں

تو بستر جھاڑ کر چادر ہٹا کر دیکھ لیتا ہوں

بہت دل کو دکھاتا ہے کبھی جب درد مہجوری

تری یادوں کی جانب مسکرا کر دیکھ لیتا ہوں

اڑا کر رنگ کچھ ہونٹوں سے کچھ آنکھوں سے کچھ دل سے

گئے لمحوں کو تصویریں بنا کر دیکھ لیتا ہوں

نہیں ہو تم بھی وہ اب مجھ سے یارو کیا چھپاؤ گے

ہوا کی سمت کو مٹی اڑا کر دیکھ لیتا ہوں

سنا ہے بے نیازی ہی علاج ناامیدی ہے

یہ نسخہ بھی کوئی دن آزما کر دیکھ لیتا ہوں

محبت مر گئی مشتاقؔ لیکن تم نہ مانو گے

میں یہ افواہ بھی تم کو سنا کر دیکھ لیتا ہوں

tum ae ho tumhen bhi azma kar dekh leta hun

tumhare sath bhi kuchh dur ja kar dekh leta hun

hawaen jin ki andhi khirkiyon par sar patakti hain

main in kamron mein phir shamen jala kar dekh leta hun

ajab kya is qarine se koi surat nikal ae

tiri baton ko khwabon se mila kar dekh leta hun

sahar dam kirchiyan tute hue khwabon ki milti hain

tu bistar jhar kar chadar hata kar dekh leta hun

bahut dil ko dikhata hai kabhi jab dard-e-mahjuri

tiri yadon ki janib muskura kar dekh leta hun

ura kar rang kuchh honton se kuchh ankhon se kuchh dil se

gae lamhon ko taswiren bana kar dekh leta hun

nahin ho tum bhi wo ab mujh se yaro kya chhupaoge

hawa ki samt ko mitti ura kar dekh leta hun

suna hai be niyazi hi ilaj-e-naummidi hai

ye nuskha bhi koi din azma kar dekh leta hun

mohabbat mar gai mushtaq lekin tum na manoge

main ye afwah bhi tum ko suna kar dekh leta hun