انداز فکر اہل جہاں کا جدا رہا

انداز فکر اہل جہاں کا جدا رہا

وہ مجھ سے خوش رہے تو زمانہ خفا رہا

عالم حیات کا نہ کبھی ایک سا رہا

دنیا میں زندگی کا تماشا بنا رہا

تھا ہر قدم پہ اپنے عزائم کا امتحاں

ہر گام حادثات کا محشر بپا رہا

پھولوں کی عہد گل میں تجارت تو خوب کی

پوچھے کوئی کہ دامن گلچیں میں کیا رہا

بار گراں تھا میرے لئے عرصۂ حیات

جینے کا تیرے غم سے بہت حوصلہ رہا

ہر فکر ہر عمل کا ہے نیت پہ انحصار

شیخ حرم بھی بندۂ حرص و ہوا رہا

دنیا عمل کی راہ میں آگے نکل گئی

زاہد تو خانقاہ میں محو دعا رہا

ہم لاکھ مسکرائے تبسم کی اوٹ سے

سوز غم حیات مگر جھانکتا رہا

اعجازؔ اہل جور سے نفرت رہی انہیں

ہر ظلم ان کی بزم میں لیکن روا رہا

andaz-e-fikr-e-ahl-e-jahan ka juda raha

wo mujh se khush rahe to zamana khafa raha

alam hayat ka na kabhi ek sa raha

duniya mein zindagi ka tamasha bana raha

tha har qadam pe apne azaim ka imtihan

har gam hadsat ka mahshar bapa raha

phulon ki ahd-e-gul mein tijarat to khub ki

puchhe koi ke daman-e-gulchin mein kya raha

bar-e-giran tha mere liye arsa-e-hayat

jine ka tere gham se bahut hausla raha

har fikr har amal ka hai niyyat pe inhisar

shaikh-e-haram bhi banda-e-hirs-o-hawa raha

duniya amal ki rah mein age nikal gai

zahid to khanqah mein mahw-e-dua raha

ham lakh muskurae tabassum ki ot se

soz-e-gham-e-hayat magar jhankta raha

ejaz ahl-e-jaur se nafrat rahi unhen

har zulm un ki bazm mein lekin rawa raha