ربط اسیروں کو ابھی اس گل تر سے کم ہے

ربط اسیروں کو ابھی اس گل تر سے کم ہے

ایک رخنہ سا ہے دیوار میں در سے کم ہے

حرف کی لو میں ادھر اور بڑھا دیتا ہوں

آپ بتلائیں تو یہ خواب جدھر سے کم ہے

ہاتھ دنیا کا بھی ہے دل کی خرابی میں بہت

پھر بھی اے دوست تری ایک نظر سے کم ہے

سوچ لو میں بھی ہوا چپ تو گراں گزرے گا

یہ اندھیرا جو مرے شور و شرر سے کم ہے

وہ بجھا جائے تو یہ دل کو جلا دے پھر سے

شام ہی کون سی راحت میں سحر سے کم ہے

خاک اتنی نہ اڑائیں تو ہمیں بھی بابرؔ

دشت اچھا ہے کہ ویرانی میں گھر سے کم ہے

rabt asiron ko abhi us gul-e-tar se kam hai

ek rakhna sa hai diwar mein dar se kam hai

harf ki lau mein idhar aur barha deta hun

ap batlaen to ye khwab jidhar se kam hai

hath duniya ka bhi hai dil ki kharabi mein bahut

phir bhi ai dost tiri ek nazar se kam hai

soch lo mein bhi hua chup to giran guzrega

ye andhera jo mire shor-o-sharar se kam hai

wo bujha jae to ye dil ko jala de phir se

sham hi kaun si rahat mein sahar se kam hai

khak itni na uraen to hamen bhi babar

dasht achchha hai ke wirani mein ghar se kam hai