دور افق کے پار سے آواز کے پروردگار

دور افق کے پار سے آواز کے پروردگار

صدیوں سوئی خامشی کو سامنے آ کر پکار

جانے کن ہاتھوں نے کھیلا رات ساحل پر شکار

شیر کی آواز کو ترسا کئے سونے کچھار

خواب کے سوکھے ہوئے خاکوں میں لذت کا غبار

نیند کے دیمک زدہ گتے کے پیچھے انتظار

تیرگی کیسے مٹے گی تیری نصرت کے بغیر

آسماں کی سیڑھیوں سے نقرئی فوجیں اتار

آخر شب سب ستارے سو رہے ہیں بے خبر

کوئی سورج کو خبر کر دو کہ اب شب خون مار

پھیلتا جاتا ہے کرنوں کا سنہری جال پھر

جگمگا اٹھی ہیں شمشیریں قطار اندر قطار

جانے کس کو ڈھونڈنے داخل ہوا ہے جسم میں

ہڈیوں میں راستہ کرتا ہوا پیلا بخار

جسم کی مٹی نہ لے جائے بہا کر ساتھ میں

دل کی گہرائی میں گرتا خواہشوں کا آبشار

dur ufuq ke par se awaz ke parwardigar

sadiyon soi khamushi ko samne a kar pukar

jane kin hathon ne khela rat sahil par shikar

sher ki awaz ko tarsa kiye sone kachhar

khwab ke sukhe hue khakon mein lazzat ka ghubar

nind ke dimak zada gatte ke pichhe intizar

tirgi kaise mitegi teri nusrat ke baghair

asman ki sirhiyon se nuqrai faujen utar

akhir-e-shab sab sitare so rahe hain be khabar

koi suraj ko khabar kar do ke ab shab khun-e-mar

phailta jata hai kirnon ka sunahri jal phir

jagmaga uthi hain shamshiren qatar andar qatar

jane kis ko dhundne dakhil hua hai jism mein

haddiyon mein rasta karta hua pila bukhar

jism ki mitti na le jae baha kar sath mein

dil ki gahrai mein girta khwahishon ka abshar