ابلاغ کے بدن میں تجسس کا سلسلہ

ابلاغ کے بدن میں تجسس کا سلسلہ

ٹوٹا ہے چشم خواب میں حیرت کا آئنہ

جو آسمان بن کے مسلط سروں پہ تھا

کس نے اسے زمین کے اندر دھنسا دیا

بکھری ہیں پیلی ریت پہ سورج کی ہڈیاں

ذروں کے انتظار میں لمحوں کا جھومنا

احرام ٹوٹتے ہیں کہاں سنگ وقت کے

صحرا کی تشنگی میں ابوالہول ہنس پڑا

انگلی سے اس کے جسم پہ لکھا اسی کا نام

پھر بتی بند کر کے اسے ڈھونڈتا رہا

شریانیں کھنچ کے ٹوٹ نہ جائیں تناؤ سے

مٹی پہ کھل نہ جائے یہ دروازہ خون کا

موجیں تھیں شعلگی کے سمندر میں تند و تیز

میں رات بھر ابھرتا رہا ڈوبتا رہا

الفاظ کی رگوں سے معانی نچوڑ لے

فاسد مواد کاغذی گھوڑے پہ ڈال آ

iblagh ke badan mein tajassus ka silsila

tuta hai chashm-e-khwab mein hairat ka aina

jo asman ban ke musallat saron pe tha

kis ne use zamin ke andar dhansa diya

bikhri hain pili ret pe suraj ki haddiyan

zarron ke intizar mein lamhon ka jhumna

ehram tutte hain kahan sang waqt ke

sahra ki tishnagi mein abualhaul hans para

ungli se us ke jism pe likha usi ka nam

phir batti band kar ke use dhundta raha

sharyanen khinch ke tut na jaen tanao se

mitti pe khul na jae ye darwaza khun ka

maujen thin sholagi ke samundar mein tund-o-tez

main rat bhar ubharta raha dubta raha

alfaz ki ragon se maani nichor le

fasid mawad kaghzi ghore pe dal a