عاشق تھے شہر میں جو پرانے شراب کے

عاشق تھے شہر میں جو پرانے شراب کے

ہیں ان کے دل میں وسوسے اب احتساب کے

وہ جو تمہارے ہاتھ سے آ کر نکل گیا

ہم بھی قتیل ہیں اسی خانہ خراب کے

پھولوں کی سیج پر ذرا آرام کیا کیا

اس گلبدن پہ نقش اٹھ آئے گلاب کے

سوئے تو دل میں ایک جہاں جاگنے لگا

جاگے تو اپنی آنکھ میں جالے تھے خواب کے

بس تشنگی کی آنکھ سے دیکھا کرو انہیں

دریا رواں دواں ہیں چمکتے سراب کے

اوکاڑہ اتنی دور نہ ہوتا تو ایک دن

بھر لاتے سانس سانس میں گل آفتاب کے

کس طرح جمع کیجیے اب اپنے آپ کو

کاغذ بکھر رہے ہیں پرانی کتاب کے

ashiq the shahr mein jo purane sharab ke

hain un ke dil mein waswase ab ehtisab ke

wo jo tumhare hath se a kar nikal gaya

ham bhi qatil hain isi khana kharab ke

phulon ki sej par zara aram kya kya

is gulbadan pe naqsh uth ae gulab ke

soe to dil mein ek jahan jagne laga

jage to apni ankh mein jale the khwab ke

bas tishnagi ki ankh se dekha karo unhen

dariya rawan dawan hain chamakte sarab ke

okara itni dur na hota to ek din

bhar late sans sans mein gul aftab ke

kis tarah jama kijiye ab apne ap ko

kaghaz bikhar rahe hain purani kitab ke