بے وفا کے وعدہ پر اعتبار کرتے ہیں

بے وفا کے وعدہ پر اعتبار کرتے ہیں

وہ نہ آئے گا پھر بھی انتظار کرتے ہیں

لوگ اب محبت میں کاروبار کرتے ہیں

دل بچا کے رکھتے ہیں جاں شکار کرتے ہیں

عشرتیں جہاں بھر کی بس انہیں کا حصہ ہے

جو روش زمانے کی اختیار کرتے ہیں

شخصیت میں جھانکیں تو اور ہی تماشہ ہے

باتیں جو نصیحت کی بے شمار کرتے ہیں

اپنے دم قدم سے تو دشت بھی گلستاں ہے

ہم جو خارزاروں کو لالہ زار کرتے ہیں

جان سے گزرتے ہیں بے خودی میں اہل دل

وہ جو چشم پر فن کو ذوالفقار کرتے ہیں

ہوں شگوفے شاخوں کے یا لویں چراغوں کی

سب ہوا کے دامن پر انحصار کرتے ہیں

ہم کہاں کے دانا ہیں کس ہنر میں یکتا ہیں

لوگ پھر بھی جانے کیوں ہم سے پیار کرتے ہیں

جس جگہ پہ خدشہ ہو پیر کے پھسلنے کا

ہم قدم وہیں اعجازؔ استوار کرتے ہیں

be wafa ke waada par etibar karte hain

wo na aega phir bhi intizar karte hain

log ab mohabbat mein karobar karte hain

dil bacha ke rakhte hain jan shikar karte hain

ishraten jahan bhar ki bas unhen ka hissa hai

jo rawish zamane ki ikhtiyar karte hain

shakhsiyat mein jhanken to aur hi tamasha hai

baten jo nasihat ki be shumar karte hain

apne dam qadam se to dasht bhi gulistan hai

ham jo kharzaron ko lala zar karte hain

jan se guzarte hain be khudi mein ahl-e-dil

wo jo chashm pur fan ko zualfaqar karte hain

hun shagufe shakhon ke ya lawen charaghon ki

sab hawa ke daman par inhisar karte hain

ham kahan ke dana hain kis hunar mein yakta hain

log phir bhi jane kyun ham se pyar karte hain

jis jagah pe khadsha ho pir ke phisalne ka

ham qadam wahin ejaz ustuwar karte hain