اب تو جگنو بھی نہیں راہ دکھانے والا

اب تو جگنو بھی نہیں راہ دکھانے والا

شہر میں قید ہوا گاؤں سے آنے والا

پھر وہی عرض مری حق و صداقت والی

پھر وہی عذر ترا حیلہ بہانے والا

فرش گل جان کے خاروں پہ قدم رکھتا ہوں

کون ہے میرے لئے پلکیں بچھانے والا

تم دکھاتے پھرو اپنا گل و گلزار بدن

کوئی مرہم نہیں زخموں پہ لگانے والا

مستقل درد کا درماں ہو وہ تدبیر سجھا

عارضی حل نہ بتا کام چلانے والا

صاف گوئی ہے مرا عیب یہ مانا لیکن

پہلے زخموں کو گنے عیب گنانے والا

معجزہ خوب ہوا جنگ بھی ہم جیت گئے

کھیل کھیلا بھی نہیں تیرا نشانے والا

چاہتا ہوں کہ ظفرؔ گھول کے پی جاؤں اسے

وہ جو نسخہ ہے سر آنکھوں سے لگانے والا

ab to jugnu bhi nahin rah dikhane wala

shahr mein qaid hua gaon se ane wala

phir wahi arz miri haq-o-sadaqat wali

phir wahi uzr tira hila bahane wala

farsh-e-gul jan ke kharon pe qadam rakhta hun

kaun hai mere liye palken bichhane wala

tum dikhate phiro apna gul-o-gulzar badan

koi marham nahin zakhmon pe lagane wala

mustaqil dard ka darman ho wo tadbir sujha

arzi hal na bata kam chillane wala

saf goi hai mira aib ye mana lekin

pahle zakhmon ko gine aib ginane wala

mojiza khub hua jang bhi ham jit gae

khel khela bhi nahin tera nishane wala

chahta hun ke zafar ghol ke pi jaun use

wo jo nuskha hai sar ankhon se lagane wala