عجیب لطف محبت کی داستان میں ہے

عجیب لطف محبت کی داستان میں ہے

وفا کا تذکرہ دنیا کی ہر زبان میں ہے

نہ وہ زمیں پہ کہیں ہے نہ آسمان میں ہے

پرندہ اس لیے محفوظ ہے اڑان میں ہے

نشاط سایہ نے معذور کر دیا اس کو

وہ کیسے دھوپ میں نکلے جو سائبان میں ہے

نصیب دیکھیے مالک تو ہو گیا بے گھر

کرایہ دار ابھی تک اسی مکان میں ہے

خلوص و مہر و وفا کی نہیں کوئی قیمت

وہ مال بکتا نہیں جو مری دوکان میں ہے

فلاں کی بات فلاں نے سنی فلاں سے کہی

بس اتنی بات پہ ہنگامہ خاندان میں ہے

ظفرؔ بتا تو سہی کیوں ہے اتنی بے خبری

دماغ کون سے دل کون سے جہان میں ہے

ajib lutf mohabbat ki dastan mein hai

wafa ka tazkira duniya ki har zaban mein hai

na wo zamin pe kahin hai na asman mein hai

parinda is liye mahfuz hai uran mein hai

nishat saya ne maazur kar diya us ko

wo kaise dhup mein nikle jo saiban mein hai

nasib dekhiye malik to ho gaya be ghar

kiraya dar abhi tak isi makan mein hai

khulus-o-mehr-o-wafa ki nahin koi qimat

wo mal bikta nahin jo miri dukan mein hai

fulan ki bat fulan ne suni fulan se kahi

bas itni bat pe hangama khandan mein hai

zafar bata to sahi kyun hai itni be khabari

dimagh kaun se dil kaun se jahan mein hai