عکس زخموں کا جبیں پر نہیں آنے دیتا

عکس زخموں کا جبیں پر نہیں آنے دیتا

میں خراش اپنے یقیں پر نہیں آنے دیتا

اس لیے میں نے خطا کی تھی کہ دنیا دیکھوں

ورنہ وہ مجھ کو زمیں پر نہیں آنے دیتا

عمر بھر سینچتے رہنے کی سزا پائی ہے

پیڑ اب چھاؤں ہمیں پر نہیں آنے دیتا

جھوٹ بھی سچ کی طرح بولنا آتا ہے اسے

کوئی لکنت بھی کہیں پر نہیں آنے دیتا

اپنے اس عہد کا انصاف ہے طاقت کا غلام

آنچ بھی کرسی نشیں پر نہیں آنے دیتا

چاہتا ہوں کہ اسے پوجنا چھوڑوں لیکن

کفر جو خوں میں ہے دیں پر نہیں آنے دیتا

aks zakhmon ka jabin par nahin ane deta

main kharash apne yaqin par nahin ane deta

is liye main ne khata ki thi ke duniya dekhun

warna wo mujh ko zamin par nahin ane deta

umr bhar sinchte rahne ki saza pai hai

per ab chhaon hamen par nahin ane deta

jhut bhi sach ki tarah bolna ata hai use

koi luknat bhi kahin par nahin ane deta

apne is ahd ka insaf hai taqat ka ghulam

anch bhi kursi nashin par nahin ane deta

chahta hun ke use pujna chhorun lekin

kufr jo khun mein hai den par nahin ane deta