کبھی کبھی کوئی چہرہ یہ کام کرتا ہے

کبھی کبھی کوئی چہرہ یہ کام کرتا ہے

مرے بدن میں لہو تیز گام کرتا ہے

ہر ایک لفظ کو ماہ تمام کرتا ہے

مری زبان سے جب وہ کلام کرتا ہے

کئی دنوں کے سفر سے میں جب پلٹتا ہوں

وہ اپنے پورے بدن سے کلام کرتا ہے

بہت عزیز ہیں اس کو بھی چھٹیاں میری

وہ روز کوئی نیا اہتمام کرتا ہے

شکایتوں کی ادا بھی بڑی نرالی ہے

وہ جب بھی ملتا ہے جھک کر سلام کرتا ہے

میں مشتہر ہوں ستم گر کی مہربانی سے

وہ اپنے سارے ستم میرے نام کرتا ہے

کسی کے ہاتھ میں خنجر کسی کے ہاتھ میں پھول

قلم ہے ایک مگر کتنے کام کرتا ہے

جب اس سے ملتا ہوں دفتر کو بھول جاتا ہوں

ظفرؔ وہ باتوں ہی باتوں میں شام کرتا ہے

kabhi kabhi koi chehra ye kam karta hai

mire badan mein lahu tez gam karta hai

har ek lafz ko mah-e-tamam karta hai

miri zaban se jab wo kalam karta hai

kai dinon ke safar se main jab palatta hun

wo apne pure badan se kalam karta hai

bahut aziz hain us ko bhi chhuttiyan meri

wo roz koi naya ehtimam karta hai

shikayaton ki ada bhi bari nirali hai

wo jab bhi milta hai jhuk kar salam karta hai

main mushtahar hun sitam gar ki mehrbani se

wo apne sare sitam mere nam karta hai

kisi ke hath mein khanjar kisi ke hath mein phul

qalam hai ek magar kitne kam karta hai

jab us se milta hun daftar ko bhul jata hun

zafar wo baton hi baton mein sham karta hai