جب ادھورے چاند کی پرچھائیں پانی پر پڑی

جب ادھورے چاند کی پرچھائیں پانی پر پڑی

روشنی اک نامکمل سی کہانی پر پڑی

دھوپ نے کچے پھلوں میں درد کا رس بھر دیا

عشق کی افتاد نا پختہ جوانی پر پڑی

گرد خاموشی کی سب میرے دہن سے دھل گئی

اس قدر بارش سخن کی بے زبانی پر پڑی

اس نے اپنے قصر سے کب جھانک کر دیکھا ہمیں

کب نظر اس کی ہماری بے مکانی پر پڑی

اصل سونے پر تھا جتنا بھی ملمع جل گیا

دھوپ اس شدت کی الفاظ و معانی پر پڑی

ترک کیجے اب دلوں میں نرم گوشوں کی تلاش

بے حسی کی خاک حرف مہربانی پر پڑی

زخم دل اس کی تواضع میں نمک داں بن گیا

یہ مصیبت بھی ہماری میزبانی پر پڑی

اپنے ہاتھوں ٹوٹنے کا تجربہ تو ہو گیا

چوٹ بے شک سخت تھی جو خوش گمانی پر پڑی

jab adhure chand ki parchhain pani par pari

raushni ik namukammal si kahani par pari

dhup ne kachche phalon mein dard ka ras bhar diya

ishq ki uftad na pukhta jawani par pari

gard khamoshi ki sab mere dahan se dhul gai

is qadar barish sukhan ki be zabani par pari

us ne apne qasr se kab jhank kar dekha hamen

kab nazar us ki hamari be makani par pari

asl sone par tha jitna bhi mulammaa jal gaya

dhup is shiddat ki alfaz-o-maani par pari

tark kije ab dilon mein narm goshon ki talash

be hissi ki khak harf mehrbani par pari

zakhm-e-dil us ki tawazo mein namak dan ban gaya

ye musibat bhi hamari mezbani par pari

apne hathon tutne ka tajriba to ho gaya

chot be shak sakht thi jo khush gumani par pari