بدن پر سبز موسم چھا رہے ہیں

بدن پر سبز موسم چھا رہے ہیں

مگر ارمان سب مرجھا رہے ہیں

پرانے غم کہاں ہجرت کریں گے

دکانوں پر نئے غم آ رہے ہیں

غلطیاں اگلے وقتوں سے ہوئی ہیں

مگر صدیوں سے ہم پچھتا رہے ہیں

یہاں ہے بوریا اب بھی ندارد

بہت دن بعد وہ گھر آ رہے ہیں

میاں بیرون و باطن ایک رکھو

منافق بھی ہمیں سمجھا رہے ہیں

سمجھتے ہیں ابھی وہ طفل مکتب

کھلونوں سے ہمیں بہلا رہے ہیں

غلاظت میں پڑی ہے روح جن کی

لباسوں کو بہت چمکا رہے ہیں

بھنور کا حکم ہے دریا پہ جاری

کنارے ناؤ سے کترا رہے ہیں

کروں کس کس کا ماتم باری باری

خزانے ڈوبتے ہی جا رہے ہیں

badan par sabz mausam chha rahe hain

magar arman sab murjha rahe hain

purane gham kahan hijrat karenge

dukanon par nae gham a rahe hain

ghalatiyan agle waqton se hui hain

magar sadiyon se ham puchhta rahe hain

yahan hai boriya ab bhi nadarad

bahut din baad wo ghar a rahe hain

miyan beron-o-batin ek rakho

munafiq bhi hamen samjha rahe hain

samajhte hain abhi wo tifl-e-maktab

khilaunon se hamen bahla rahe hain

ghilazat mein pari hai ruh jin ki

libason ko bahut chamka rahe hain

bhanwar ka hukm hai dariya pe jari

kinare nao se katra rahe hain

karun kis kis ka matam bari bari

khazane dubte hi ja rahe hain