یہ کیا تحریر پاگل لکھ رہا ہے

یہ کیا تحریر پاگل لکھ رہا ہے

ہر اک پیاسے کو بادل لکھ رہا ہے

نہ رو گستاخ بیٹے کے عمل پر

ترا گزرا ہوا کل لکھ رہا ہے

پڑھو ہر موج آیت کی طرح ہے

وہ دریا پر مسلسل لکھ رہا ہے

تھمے پانی کو تبدیلی مبارک

ہوا کا ہاتھ ہلچل لکھ رہا ہے

تجھے چھونا نرالا تجربہ تھا

وہ جھوٹا ہے جو مخمل لکھ رہا ہے

بنا کر شہر کا نقشہ وہ بچہ

بڑے حرفوں میں جنگل لکھ رہا ہے

خدائے امن جو کہتا ہے خود کو

زمیں پر خود ہی مقتل لکھ رہا ہے

ye kya tahrir pagal likh raha hai

har ik pyase ko badal likh raha hai

na ro gustakh bete ke amal par

tira guzra hua kal likh raha hai

parho har mauj ayat ki tarah hai

wo dariya par musalsal likh raha hai

thame pani ko tabdili mubarak

hawa ka hath halchal likh raha hai

tujhe chhuna nirala tajriba tha

wo jhuta hai jo makhmal likh raha hai

bana kar shahr ka naqsha wo bachcha

bare harfon mein jangal likh raha hai

khuda-e-amn jo kahta hai khud ko

zamin par khud hi maqtal likh raha hai