بے حسی پر حسیت کی داستاں لکھ دیجئے

بے حسی پر حسیت کی داستاں لکھ دیجئے

دھوپ سے اب برف پر آب رواں لکھ دیجئے

کاتب تقدیر ٹھہرے آپ کو روکے گا کون

جو بھی انکر سر اٹھائے رائیگاں لکھ دیجئے

آپ کی آنکھوں میں چبھ جائے گی ورنہ روشنی

ہم چراغوں کے مقدر میں دھواں لکھ دیجئے

مشتہر ہو جاؤں گا فرقہ پرستی کے لئے

میری پیشانی پہ آپ اردو زباں لکھ دیجئے

ہم غریبوں سے رعایت کی ضرورت ہی نہیں

صبحیں دوزخ ہیں تو شاموں کو دھواں لکھ دیجئے

آپ تو شاید قسم ہی کھا چکے تخریب کی

ہر جگہ دھرتی پہ اب آتش فشاں لکھ دیجئے

be hissi par hissiyyit ki dastan likh dijiye

dhup se ab barf par ab-e-rawan likh dijiye

katib-e-taqdir thahre ap ko rokega kaun

jo bhi ankar sar uthae raigan likh dijiye

ap ki ankhon mein chubh jaegi warna raushni

ham charaghon ke muqaddar mein dhuan likh dijiye

mushtahar ho jaunga firqa parasti ke liye

meri peshani pe ap urdu zaban likh dijiye

ham gharibon se riayat ki zarurat hi nahin

subhen dozakh hain to shamon ko dhuan likh dijiye

ap to shayad qasam hi kha chuke takhrib ki

har jagah dharti pe ab atish fishan likh dijiye