خاک سے لالہ و گل سنبل و ریحاں نکلے

خاک سے لالہ و گل سنبل و ریحاں نکلے

تم بھی پردے سے نکل آؤ کہ ارماں نکلے

بند آنکھیں کئے ہم منتظر جلوہ رہے

جب کھلی آنکھ تو خود جلوۂ جاناں نکلے

بے تکلف مجھے آزاد نگاہی منظور

خود تعین سے مگر جلوۂ جاناں نکلے

شیخ میخانے میں آنے کو مسلمان آیا

کاش میخانے سے نکلے تو مسلماں نکلے

کیا کوئی بزم حسیں زیر زمیں اور بھی ہے

پھول کیوں چاک جگر چاک گریباں نکلے

رنگ و بو قافلہ در قافلہ آئے تھے ذہینؔ

چند اڑتے ہوئے سائے تھے گریزاں نکلے

khak se lala-o-gul sumbul-o-raihan nikle

tum bhi parde se nikal ao ke arman nikle

band ankhen kiye ham muntazir-e-jalwa rahe

jab khuli ankh to khud jalwa-e-janan nikle

be takalluf mujhe azad nigahi manzur

khud taayyun se magar jalwa-e-janan nikle

shaikh maikhane mein ane ko musalman aya

kash maikhane se nikle to musalman nikle

kya koi bazm-e-hasin zer-e-zamin aur bhi hai

phul kyun chak-e-jigar chak-e-gareban nikle

rang-o-bu qafila dar qafila ae the zahin

chand urte hue sae the gurezan nikle