محبت رہنما اپنی محبت راہبر اپنی

محبت رہنما اپنی محبت راہبر اپنی

ادھر نکلی تری منزل جدھر اٹھی نظر اپنی

دل بے جذب اپنا ہے نہ آہ بے اثر اپنی

ان آئینو میں دیکھیں وہ ادائیں جلوہ گر اپنی

کہاں سے لائے گی عمر دو روزہ عہد رفتہ کو

کہاں یادش بخیر اب شام اپنی وہ سحر اپنی

مزاج حسن خود بیں کو محبت کی نظر سمجھی

سمجھتے ہیں محبت کی نظر کو وہ نظر اپنی

کہاں ہے حسن کو مستی میں ہوش التفات اے دل

وہ کیا اپنی خبر لیں گے نہیں جن کو خبر اپنی

ذہینؔ اپنے لئے دیر و حرم دونوں برابر ہیں

جدھر سے وہ گزرتے ہیں وہی ہے رہ گزر اپنی

mohabbat rahnuma apni mohabbat rahbar apni

idhar nikli tiri manzil jidhar uthi nazar apni

dil-e-be jazb apna hai na ah be asar apni

un aino mein dekhen wo adaen jalwa gar apni

kahan se laegi umr do roza ahd-e-rafta ko

kahan yadash bakhair ab sham apni wo sahar apni

mizaj-e-husn-e-khud bin ko mohabbat ki nazar samjhi

samajhte hain mohabbat ki nazar ko wo nazar apni

kahan hai husn ko masti mein hosh-e-iltifat ai dil

wo kya apni khabar lenge nahin jin ko khabar apni

zahin apne liye dair-o-haram donon barabar hain

jidhar se wo guzarte hain wahi hai rah guzar apni