سلام آیا نہ کچھ پیغام آیا

سلام آیا نہ کچھ پیغام آیا

تغافل ان کا میرے کام آیا

وہ ہیں اپنے نہ ہونے سے نمایاں

نگاہوں پر نیا الزام آیا

مثل مشہور ہے یہ میکدے میں

ہوا پختہ یہاں جو خام آیا

حکیم عصر کو مستی میں آکر

علاج گردش ایام آیا

شب غم دل کو تڑپانے ہی آئے

تم آئے یا تمہارا نام آیا

محبت وقت پر حاکم ہے پھر بھی

تصور ان کا صبح و شام آیا

در پیر مغاں پر ہے یہ کتبہ

گیا خوش کام جو ناکام آیا

جو دیکھا مہد سے لے کر لحد تک

گئیں بے چینیاں آرام آیا

ذہیںؔ پیراہن یوسف سمجھ کر

غلاف کعبہ کو میں تھام آیا

salam aya na kuchh paigham aya

taghaful un ka mere kam aya

wo hain apne na hone se numayan

nigahon par naya ilzam aya

misl-e-mashhur hai ye maikade mein

hawa pukhta yahan jo kham aya

hakim-e-asr ko masti mein akar

ilaj-e-gardish-e-ayyam aya

shab-e-gham dil ko tarapane hi ae

tum ae ya tumhara nam aya

mohabbat waqt par hakim hai phir bhi

tasawwur un ka subh-o-sham aya

dar-e-pir-e-mughan par hai ye katba

gaya khush kam jo nakam aya

jo dekha mahd se le kar lahad tak

gain be chiniyan aram aya

zahin pairahan-e-yusuf samajh kar

ghilaf-e-kaaba ko main tham aya