عمر بھر پوجا ہے میں نے جس کو وہ در ہے یہی

عمر بھر پوجا ہے میں نے جس کو وہ در ہے یہی

بت کدہ میرا یہی اللہ کا گھر ہے یہی

جھک گیا دل روح نے سجدہ کیا بے اختیار

جلوہ گاہ دل نواز و روح پرور ہے یہی

کٹ گئیں ہوش و خرد کی بیڑیاں آ کر یہاں

مرکز جذب و جنوں اللہ اکبر ہے یہی

ذرے ذرے سے یہاں کے آ رہی ہے بوئے دوست

چھوڑ کر گھر ہم جہاں آئے ہیں وہ گھر ہے یہی

جگمگا اٹھے ہیں شرق و غرب جس کے نور سے

مہر عالم تاب ماہ نور گستر ہے یہی

umr bhar puja hai main ne jis ko wo dar hai yahi

but kada mera yahi allah ka ghar hai yahi

jhuk gaya dil ruh ne sajda kya be ikhtiyar

jalwa gah-e-dil nawaz-o-ruh parwar hai yahi

kat gain hosh-o-khirad ki beriyan a kar yahan

markaz-e-jazb-o-junun allah akbar hai yahi

zarre zarre se yahan ke a rahi hai bu-e-dost

chhor kar ghar ham jahan ae hain wo ghar hai yahi

jagmaga uthe hain sharq-o-gharb jis ke nur se

mehr-e-alam tab-e-mah-e-nur gustar hai yahi