خود اپنے علم کی آنکھوں میں بے پردہ نہیں آتا

خود اپنے علم کی آنکھوں میں بے پردہ نہیں آتا

بہت دیکھا ہے اپنے آپ کو لیکن نہیں دیکھا

اگر ہوگا ہمارا علم اپنی ذات پر زائد

ممیز خود بخود ہو جائے گا مشہود سے شاہد

عدم کا اپنے مجھ کو علم ہے علم عدم کیا ہے

فقط معدوم کا معلوم ہونا کچھ نہ ہونا ہے

یہ محسوسات و مشہودات و معلومات کیا شے ہیں

تماشہ دیکھنے والوں کے دم سے سب تماشے ہیں

تن بے جاں ہے عالم زندگی ہم نے عطا کی ہے

حقیقت اپنی روحی اور صورت اپنی خاکی ہے

وہ جاں ہوں جسم کے ایک ایک ذرے میں رواں ہوں میں

نہیں ہوں میں کہاں فرمائیے ہوں تو کہاں ہوں میں

وہ غنچہ ہوں کہ تجزیہ کی راہیں بند ہیں مجھ پر

وہ نقطہ ہوں کہ جس کی سیر ہی کونین کا محور

وہ عالم ہوں کہ اپنی علم کی آنکھوں سے اوجھل ہوں

ازل سے ہوں ابد تک ہوں مسلسل ہوں مکمل ہوں

یہ قیدیں میرے ہونے پر مکانوں کی زمانوں کی

امانت میری ہونے میں زمینوں آسمانوں کی

khud apne ilm ki ankhon mein be parda nahin ata

bahut dekha hai apne ap ko lekin nahin dekha

agar hoga hamara ilm apni zat par zaid

mumayyaz khud bakhud ho jaega mashhud se shahid

adam ka apne mujh ko ilm hai ilm-e-adam kya hai

faqat maadum ka maalum hona kuchh na hona hai

ye mahsusat-o-mashhudat-o-maalumat kya shai hain

tamasha dekhne walon ke dam se sab tamashe hain

tan-e-be jan hai alam zindagi ham ne ata ki hai

haqiqat apni ruhi aur surat apni khaki hai

wo jan hun jism ke ek ek zarre mein rawan hun main

nahin hun main kahan farmaiye hun to kahan hun main

wo ghuncha hun ke tajziya ki rahen band hain mujh par

wo nuqta hun ke jis ki sair hi kaunain ka mehwar

wo alam hun ke apni ilm ki ankhon se ojhal hun

azal se hun abad tak hun musalsal hun mukammal hun

ye qaiden mere hone par makanon ki zamanon ki

amanat meri hone mein zaminon asmanon ki