مٹائیں صبر دل سے صبر کی تلقین فرمائیں

مٹائیں صبر دل سے صبر کی تلقین فرمائیں

سکون دل وہی چھینیں وہی تسکین فرمائیں

محبت میں زبوں حالی کی وہ تزئین فرمائیں

وہ غم دیں ضبط غم کی داد دیں تحسین فرمائیں

مجاز عشق کی دشواریاں شاید حقیقی ہیں

وہ سن سن کر دعائیں ورنہ کیوں آمین فرمائیں

سکون حسن جانے اضطرار عشق کیا شے ہے

تلون کیا ہے اس کو صاحب تمکین فرمائیں

ذہینؔ اس میں خود ان کے حسن کامل کی اہانت ہے

بھلا وہ اور میرے عشق کی توہین فرمائیں

mitaen sabr dil se sabr ki talqin farmaen

sukun-e-dil wahi chhinen wahi taskin farmaen

mohabbat mein zabun hali ki wo tazin farmaen

wo gham den zabt-e-gham ki dad den tahsin farmaen

majaz-e-ishq ki dushwariyan shayad haqiqi hain

wo sun sun kar duaen warna kyun amin farmaen

sukun-e-husn jane iztirar-e-ishq kya shai hai

talawwun kya hai us ko sahab-e-tamkin farmaen

zahin is mein khud un ke husn-e-kamil ki ihanat hai

bhala wo aur mere ishq ki tauhin farmaen